Nag-gwa sa dalanon kag nagprotesta ang pila ka mga residente sa dalagku nga syudad sa Estados Unidos agud magpanawagan sa mga election officials sa pungsod nga isipon gid sang husto ang tagsa ka boto sa pagkapresidente.
Ini ang kasunod sang false claim kag premature declaration ni incumbent US president Donald Trump nga siya na ang nagdaug sa pagkapresidente apisar wala pa nila nalab-ot ni Democrat Presidential Candidate Joe Biden ang requisite nga 270 electoral college votes.
Suno kay Bombo International Correpondent Alex Vidal direkta sa New York, isa sa Bombo Radyo Iloilo international correspondents sa 50 ka estado sa Estados Unidos kag sa District of Columbia, iya ginpahayag nga Democrats ukon supporters ni Biden ang kalabanan nga nagamartsa sa mga dalanon agud protestahan ang agresibo nga claim ni Trump sa iya kadalag-an.
Sa Minneapolis, nakalab-ot na ang mga tawo sa freeways kag may iban nga gin-aresto sang kapulisan.
Sa Portland, nagtingob ang mga tawo sa atubang sang waterfront agud pamatukan ang mga attempt ni Trump sa pagpakighilabot sa vote count.
Sa New York, may peaceful demonstration ang mga tawo sa Manhattan para sa ‘COUNT EVERY VOTE’ kag agud magpabor man sa ila ginapanawagan nga racial equality.
Sa Phoenix, kapin 150 ka pro-Trump protesters ang nagtingob sa gwa sang recorder’s office sang county bangud nagapati sila nga ang close watch sa pag-isip sang boto amo ang makatumod kun sin-o kanday Trump kag Biden ang daug sa eleksyon subong nga tuig.
Suno kay Vidal, pila sa mga Pinoy sa amo mga lugar ang luyag na lang nga mag-move on sa resulta sang eleksyon bangud magluwas sa problema sa tunga sang Republicans kag Democrats, madamo pa sang ginapangatubang nga isyu ang Estados Unidos.
Apang may pila man ka Filipino suno kay Vidal nga tuman ka passionate kag nagapabutyag sang suporta kay Trump kun may magapahimuon nga people power. Ini ang kasunod man sang mga pahayag ni Trump nga may ‘fraud’ sa election results kag may mga iregularidad sa pag-isip sang mail-in ballots.
Sa subong, si Trump ang may yara na sang 214 electoral college votes samtang may 264 naman si Biden.
