ILOILO – Nagdangat sa masobra P90 million ang balor sang halit sang nag-agi nga Bagyo Quinta sa agrikultura sa probinsya sang Iloilo.
As of November 6 nga Quinta Damage Assessment Report sang Provincial Agriculture Office, 32 ka mga kabanwahanan sa probinsya ang apektado sang pagbaha.
Lakip diri ang Cabatuan, Dueñas, Dingle, Tigbauan, San Enrique, Santa Barbara, Janiuay, Carles, Bingawan, Dumangas, Pototan, Tubungan, Zarraga, Leon, Balasan, Mina, San Rafael, Passi City, Anilao, Igbaras, Sara, Oton, San Dionisio, Leganes, Maasin, Lambunao, Barotac Viejo, Miagao, Estancia, Badiangan, New Lucena, kag San Miguel.
Sa sini nga mga kabanwahanan, 9, 388 ang apektado nga mga mangunguma kun sa diin 3,192 ang may naubos hapay ukon lumos nga mga pananom.
Sa interview sang Bombo Radyo kay Iloilo Provincial Agriculture Officer Dr. Ildefonso Toledo, iya ginpahayag nga kun magdeklarar ang probinsya ukon ang banwa sang state of calamity, mahimo mahulag ang calamity fund apang lantawon pa ang extent of damage sa tagsa ka apektado nga banwa.
Madumduman nga sang naglaslas ang Bagyo Quinta sang Nobyembre 1, ginpaidalom sa Tropical Cyclone Storm Signal Number 1 ang Northern Iloilo.
