ILOILO CITY – Todo ang pagpanghanda sang mga opisyal sa Brgy. Aguinaldo, La Paz, Iloilo City nga mapabilin ang 92% ukon mas mataas pa nga rating sang compliance sa road clearing operations sa ila nga barangay.
Sa interview sang Bombo Radyo kay Punong Barangay Oscar Guarin, iya ginpahayag nga nangin masinulundon ang mga residente sang ila nga barangay sang nagligad nga hugnat sang Oplan Hawan sa syudad rason nga nalab-ot ang kapin 100% nga rating.
Apisar wala pa nakaabot ang Nobyembre 16 nga amo ang petsa sang pag-umpisa sang Oplan Hawan Karsada sa syudad sang Iloilo, nakadesignar na ang mga opisyal sang mga nagakaigu nga lugar para maka-park sang legal ang mga salakyan.
Gingamit ang bakante nga espasyo sa barangay court, bahin sang barangay hall, kag bakante nga lote sa Zone 5 agud mahatagan sang lugar ang pagpark sang pedicabs, private vehicles, kag tricycles.
May ginahanda naman nga mga NO PARKING signages.
Nagpaandam man ang punong barangay sa mga salawayon nga residente nga wala na sang iga-excuse sa maabot nga Nobyembre 16.
Ang Oplan Hawan ang may kaangtanan sa gin-isyu ni Interior Secretary Eduardo Año nga Memorandum 2020-145 nga nagahatag sa local government units (LGUs) sang tion tubtob sa Enero 15, 2021 nga hawanon ang mga dalanon apang depende sa quarantine classification sang lugar.
