Ginmanduan ni Iloilo City Mayor Jerry Treñas ang Iloilo City Police Office nga dugangan pa ang police visibility agud malikawan ang pagluntad sang mga krimen partikular na ang pagpanghold-up sa syudad.
Ini ang kasunod sang natabo sa Barangay Dulunan, Arevalo, Iloilo City sang damlag lang kun sa diin ginsulod sang duha ka mga kawatan ang apartment sang 39-anyos nga lalaki nga Chinese national.
Natigayon nga makuha sang mga suspek ang masobra P100,000 nga kwarta sang biktima, cellphone, kag L300 van nga gingamit sa pagpalagyo apang sang ulihi narecover ang van sang ginpatigayon ang hot pursuit operation.
Nahibaluan nga nakasulod ang mga suspek sa subdivison bangud nagrason sila sa security guard nga ginapatawag sila sang Chinese National sa iya nga apartment.
Sa interview sang Bombo Radyo kay Mayor Treñas, iya ginpahayag nga dapat padayon sa paglibot ang police patrol cars kag magbantay man sa mga dalanon.
Dapat man nga may yara sang mobile checkpoints agud mabantayan ang nagadala sang mga armas-luthang.
Dapat man suno sa alkalde nga mangin istrikto ang mga security guards sa ginabantayan nga mga subdivision, balay, ukon building agud indi sila mapasibangdan nga kahimbon sa mahimo matabo nga krimen.
