Posible nga may kaangtanan sa pagpangawat ang rason sa pagbuno-patay sa 47-anyos nga barangay secretary sang Barangay Poblacion Ilawod, Lambunao, Iloilo.
Ang biktima amo si Jimmy Cayanan, isa ka negosyante kag ginapahayag presidente sang LGBTQ (lesbian, gay, bisexual, transgender and queer) community sa nasambit nga banwa.
Sa interview sang Bombo Radyo kay Police Major Jogen Suegay, hepe sang Lambunao Municipal Police Station, iya ginpahayag nga lima tubtob anum ka pilas ang naangkon sang biktima sa iya nga lawas matapos ginhatok-hatok sang buno sa sulod mismo sang iya nga tiangge sa amo nga barangay.
May pilas si Cayanan sa dulunggan, abaga, wala nga paa, kag kamot samtang patal nga pilas ang yara sa dughan kag liog.
Tatlo naman ang ginapahayag suspek kun sa diin duha ang menor de edad kag isa ang may legal nga edad.
Suno kay Suegay, santo sa panaysayon sang mga tawo sa palibot, ginsulod sang mga suspek ang biktima pasado 10:00 sang Domingo sang gab-i kag posible may tuyo nga magpangawat.
Yara na sa kustodiya sang Lambunao PNP ang isa ka 16-anyos nga suspek nga nagtuad nga siya ang nagserbe nga driver halin sa banwa sang Calinog kag nagpadulong sa tiangge ni Cayanan.
Ginatudlo sang amo nga menor de edad ang isa ka suspek nga may legal nga edad nga amo ang nagpangamot sa pagpamuno.
Samtang, sa exclusive interview sang Bombo Radyo kay Punong Barangay Niel Lataniafrancia, iya
ginpahayag nga duha ang kaupod sang biktima antes natabo ang insidente kun sa diin ang isa amo ang ginaalegar nobyo sang biktima.
Matapos mag-inom inom sa Lambunao, ginpasakay pa ni Cayanan ang duha ka lalaki sa tricycle agud makapauli sila sa Calinog.
Kasunod sini, nagpahuway na si Cayanan sa iya tiangge apang nagbalik ang mga suspek upod ang isa ka menor de edad halin sa Calinog kag posible suno sa punong barangay nga gin-interesan sang mga suspek ang kwarta ni Cayanan bangud bag-o lang ini nakapangsukot sa renta sa mga kiosko.
Magluwas diri, may mga alahas man kag cellphone ang biktima.
Ginapahayag sang punong barangay nga posible nakabugtaw ang biktima sang nagtuyo nga magpangawat ang mga suspek rason nga ginpatay na lang nila ini.
Nagapadayon pa subong ang imbestigasyon sang kapulisan kag at large pa ang duha ka iban nga mga suspek.
