Mas pasangkadon pa sang Iloilo City Government ang kampanya batok sa COVID-19.
Ini ang pahayag ni Iloilo City Mayor Jerry Treñas kasunod sang paggwa sang resulta sang survey sang Random Access Consultants Incorporated (RACI) sang nagligad nga semana kun sa diin nagapakita nga madamo gihapon sa syudad sang Iloilo ang wala nagapati nga mahimo sila malatnan sang COVID-19.
Ang survey ang ginconduct sa 200 ka respondents sa nanuhay-tuhay nga distrito sa syudad, nagaedad 18-60 anyos, kag kalabanan ang yara sa lower-income class.
Katunga sa sini nga numero ang nagpahayag nga mga tigulang lang kag kabataan ang mahimo mainfect sang nasambit nga balatian.
53.5% naman sa mga respondents ang nagpahayag nga may ihibalo kag nakahangop sila sang mga health protocols agud indi matapikan sang virus pero wala nila ini gina-practice.
Sa interview sang Bombo Radyo kay Mayor Treñas, iya ginpahayag nga may ginahanda na subong nga mga testimonies sang mga naka-recover sa balatian kag mga tawo halin sa nanuhay-tuhay nga mga sektor kag ini ang masami nga ipabati sa mga pumuluyo.
Liwat man nga naghingyo ang alkalde sang community effort ukon pagbinuligay agud matapna ang
transmission sang balatian.
