“I am a political person and I will always look at things politically.”
Ini ang diretso nga sabat ni Iloilo City Mayor Jerry Treñas sa isyu nga ‘gin-pulitika’ niya ang pagpatigayon sang Random Access Consultants Incorporated (RACI) survey sa syudad sang Iloilo may kaangtanan sa COVID-19 status sa syudad.
Sa interview sang Bombo Radyo kay Treñas, iya gin-athag nga personal niya nga kwarta ang gingamit sa ‘political survey’ kag wala sang labot ang pondo sang syudad.
Suno sa alkalde, bilang isa ka tawo nga nagapangalagad sa patag sang pulitika, ginahimo na niya ang mga political surveys halin sang 2010 agud matumod ang luyag kag indi luyag sang mga pumuluyo.
“I am a political person and I will always look at things politically. Patalikudon mo ko, paatubangon mo ko, pabaliskadon mo ko, matan-aw gid ko ya sa mga butang ‘politically’. Para na sa akon consumption. Para matan-aw ko man kun ano ang perception sang tawo kag kun ano ang nagustuhan nila kag ano ang indi niya nagustuhan,” pahayag sang alkalde.
Gindala na lang suno kay Treñas ang COVID-19 sa survey nga ginpatigayon kag husto man nga desisyon suno sa iya bangud may yara sang nakuha nga mga scientific data nga mahimo magamit sa COVID-19 response sang Iloilo City Government.
Sa pamangkot kun bala naangot na sa 2022 elections ang pagpatigayon sang iya political surveys, sabat sang alkalde: “Ang eleksyon matabo gid ina. Survey is a survey that we use to know kun ano ang preferences sang tawo. Ang survey sa COVID naupod ni sa political survey. Maayo gani kay may nakuha kita nga scientific data nga magamit naton sa away sa COVID-19 pandemic.”
Nahibaluan nga lakip sa nadiskubrehan sa ginpatigayon nga RACI survey sang nagligad nga semana amo nga madamo gihapon sa syudad sang Iloilo ang wala nagapati nga mahimo sila malatnan sang COVID-19.
Ang survey ang ginconduct sa 200 ka respondents sa nanuhay-tuhay nga distrito sa syudad, nagaedad 18-60 anyos, kag kalabanan ang yara sa lower-income class.
Katunga sa sini nga numero ang nagpahayag nga mga tigulang lang kag kabataan ang mahimo mainfect sang nasambit nga balatian.
