ILOILO CITY – Naghagan-hagan ang pagpanghakroy kag kasakit nga nabatyagan sang mga biktima sang sunog sa Sitio Bukid-Bukid, San Pedro, Molo, Iloilo City matapos nakabaton sang bulig halin sa iban nga mga pumuluyo sa syudad sang Iloilo.
Sa interview sang Bombo Radyo kay Gina Atadero, tag-iya sang isa sa mga totally burned nga balay, iya ginpahayag nga matapos ang iya panawagan kag pagtalangison sa estasyon sang Bombo, madamo ang nagpakig-angot sa iya kag sa iban pa nga nasunugan kag naghatag sang bulig nga nakapiyan-piyan sang ila mga kinahanglanon.
Apisar wala gid sang nasalbar sa mga gamit sa ila nga balay, nalipay si Atadero bangud wala gid nagduha-duha sa pagbulig ang mga tawo sa ila pati na ang iban nga indi man niya kilala.
“Halin kaina sang naghalin ko sa obra, amo lang to ang bayo ko pero subong nakailis na kay madamo ang nagbulig sa amon,” pahayag ni Atadero.
Sa subong, nagatinir si Atadero kag ang iban nga apektado sa Molo 1 Elementary School.
Nahibaluan nga sa natabo nga sunog kaina sang aga, ginabanta P280,000 ang balor sang natuga nga halit sa lima ka totally burned nga balay kag anum ka partially burned nga mga balay.
Ang mga tag-iya sang totally burned amo sanday Gloria Jotes; Diego Ayuban; Rex Galicia; Zaldy Atadero; kag Jing Guyoyan.
Ang mga partially burned naman ang balay ang ginapanag-iyahan nanday Redgie Panes; Renato Chavez; Teresita Panongalinga; Karen Ferrer; Vic Chavez; kag Jocelyn Embang.
Nagapadayon pa subong ang imbestigasyon sang Iloilo City Fire Station apang matandaan nga una nga ginpahayag nga may nagpaandar sang generator set apang naglupok nga amo ang gintunaan sang sunog.
