ILOILO – Away sa duta ang ginalantaw rason sa pagluthang-patay sa isa ka lalaki sa Barangay Bagacay, San Dionisio, Iloilo.
Ang biktima amo si Zaldy Villanueva, 50 anyos, residente sang nasambit nga lugar, kag pakaisa ni the late Mayor Larry Villanueva.
Ang ginatudlo nga suspek amo si Raffy Sorioso, ginapahayag bata-bata ni Carlos ‘Poypoy’ Lopez, anak ni anay San Dionisio Mayor Peter Paul Lopez.
Sa interview sang Bombo Radyo kay Police Captain Rene del Castillo, hepe sang San Dionisio Municipal Police Station, iya ginpahayag nga ang ginaawayan nga duta amo subong ang ginapanag-iyahan ni anay SB Member Tessie Villanueva apang madugay naman nga gina-reclaim sang kampo sang mga Lopez.
Suno kay del Castillo, nagpadulong ang biktima sa disputed land bangud ginapahayag ginpasudlan ini sang traktora kag ginpaobra sang grupo sang mga Lopez.
Pag-abot ni Zaldy sa lugar, ginapahayag nga ginsumalang siya ni Sorioso kag ginluthang sa ulo kun sa diin patal nga pilas ang iya na-angkon nga amo ang gintunaan sang iya nga kamatayon.
At-large subong si Sorioso samtang padayon man ang imbestigasyon sang kapulisan kun ano ang kahilabtanan ni Poypoy Lopez nga ginaalegar yara man sa lugar sang natabo ang krimen.
SUNO SA PAMILYA VILLANUEVA
Nagapanindugan naman sang pamilya Villanueva nga nadala si Poypoy Lopez sa dapat kabigon nga suspek sa krimen.
Sa interview sang Bombo Radyo kay anay SB Member Tessie Villanueva, iya ginpahayag nga makig-istorya lang kuntani si Zaldy sa mga Lopez kun ngaa ginpaobra nila ang amo nga duta.
Iya ginpahayag nga santo sa panaysayon sang kaupod sang biktima sang natabo ang krimen, si Sorioso ang nangamot sa pagpangluthang apang nabatian pa nga nagsinggit kag nagmandu si Poypoy Lopez nga, “Patya na lang! Sure-bola na, patya na lang!”
Dugang pa ni Villanueva, magluwas kanday Lopez kag Sorioso, may duha pa ka lalaki nga nagatindog sa unhan kag kahimbon sa krimen.
Desidido ang pamilya Villanueva nga magpasaka sang kaso batok sa ila ginaalegar nga mga suspek.
Bukas ang Bombo Radyo Iloilo sa pahayag sang nadalahig nga mga pangalan.
