Naidentify na ang truck kag ang barangay nga ginkikanan sang walo ka bulan nga lapsag nga ginhaboy sa Calajunanan Sanitary Landfill sa distrito sang Mandurriao, Iloilo City.
Sa interview sang Bombo Radyo kay Engineer Niel Ravena, pinuno sang General Services Office (GSO), iya ginpahayag nga sa iya inisyal nga pagpangusisa, sa distrito sang Jaro naghalin ang truck.
Suno kay Ravena, nainterview na niya ang driver sang truck apang indi pa mahimo masapubliko ang nakuha nga impormasyon bangud nagapadayon pa ang verification sang ila nga team.
Ginpahayag ni Ravena nga sang una, may yara sang waste segregation nga ginahimo sa landfill rason nga matumod gilayon kun may lapsag nga ginahaboy.
Nauntat ang waste segregation subong nga tuig bangud sa COVID-19 threat nga dala sang infectious wastes.
Mas maayo suno sa natungdan kun may yara na sang maayo nga segregation sa material recovery facility sang tagsa ka barangay.
Gintuad man sang opisyal nga madugay na nga problema ang mga ginahaboy nga fetus sa Calajunan Sanitary Landfill kag naisipan man nga ipalab-ot sa media agud makonsensya ang mga ginikanan nga responsable sa amo nga mga iligal nga akto.
