Naga-facilitate lang ang local government unit kag nagasunod sa protocol sang Department of Health kag sang mga ospital may kaangtanan sa pagpalubong sa mga COVID-19 suspects.
Ini ang depensa ni Mayor Emmanuel Galila sang Nueva Valencia, Guimaras kasunod sang naggwa nga negatibo nga COVID-19 result sang isa nila ka napatay nga residente.
Matandaan nga 8:00 sa gab-i sang gindali dali palubong ang 77-anyos nga tigulang santo sa mandu sang Dr. Catalino Gallego Nava Provincial Hospital bangud ginapahayag nga infected ini sang COVID-19.
Lima ka adlaw ang nakaligad, naggwa ang swab test result kag napamatud-an nga negatibo ini sa virus.
Sa interview sang Bombo Radyo kay Mayor Galila, iya ginpahayag nga nagapangayo gid siya sang pasaylo nga wala na nahaya sang pamilya ang ila napatay nga himata.
Samtang, nagalain sa gihapon ang buot sang pamilya bangud sang natabo sa 77 anyos nga tigulang.
Magluwas nga gindali dali ini palubong, ginpahayag pa sang pamilya nga may mga tawo sa ila palibot nga nag-discriminate sa ila sang gindudahan nga COVID-19 suspect ang tigulang.
Sa interview sang Bombo Radyo kay Erlyn Emberga, anak sang napatay nga tigulang, iya ginpahayag nga mas maayo pa nga ipakita gid sa nawong sang mga tawo nga negatibo ang swab test results.
“May mga tawo gid ya nga buhi ka pa, ginapatay ka na. O te kay ari na ang swab test (result), ihampak ni sa itsura sang tawo nga mga judgmental!,” pahayag ni Emberga.
Plano subong sang pamilya nga magpa-misa agud mapangamuyuan ang ila nagtaliwan nga himata.
