Nagasingkal ang kaakig ni Presidente Rodrigo Duterte kay Vice President Leni Robredo kag ini ang maathag niya nga ginsapubliko paagi sa pagpakamalaot sa bise presidente sa iya mismo nga public address.
Gin-akusaran ni Presidente Duterte si Robredo nga ginpatalang sini ang publiko kag ginpapati nga missing-in-action siya sang naglaslas ang Bagyo Ulysses.
Suno kay Duterte, indi matuod nga nangindulaan siya sang naglaslas ang bagyo sa Luzon bangud sang amo nga tion, nagatambong siya sang virtual ASEAN Summit.
Liwat man nga nagdepensa si Duterte nga isa siya ka night person kag nagapulaw siya kun gab-i bangud ginabasa niya kag ginareview ang mga official documents.
Suno sa presidente, wala siya nagatulog samtang nagasuprer ang mga tawo sa paglaslas sang bagyo.
Gintawag man ni Duterte si Robredo nga nagapaporma-porma subong nga may kalamidad.
Nagpaandam man siya nga waswasan si Robredo kun magpadalagan ini sa 2022 elections.
Gintapos niya ang kapin 20 ka minutos nga rant batok sa bise-presidente paagi sa pagkwestyon kun sa diin ini tagsa ka gab-i kag kun sa diin ini nagapauli.
“THE PRESIDENT IS MISOGYNIST”
“When a President is a misogynist, the conversation goes down to this level. Eto po yung ginagawa namin gabi gabi, nagpupuyat ilang linggo na para, araw-araw, may madala lang na tulong sa mga nangangailangan.”
Madasig ang nangin sabat sang bise presidente sa pagpakamalaot ni Presidente Duterte.
Sa iya Twitter, nagpaathag si Robredo nga sang tion nga naglaslas ang Bagyo Ulysses, wala niya ginkwestyon ang whereabouts ni Duterte.
Posible suno sa iya nga may nagduhol sang fake news kay Duterte rason nga nag-ibwal ang kaakig sini kag napikon kay Robredo.
Matandaan nga sang natabo ang paglaslas sang Bagyo Ulysses, aktibo si Robredo sa pagbisita sa mga biktima kag sa pagrelay sang mga tawag para sa nagakaigu nga rescue operations.
Samtang, nag-trend naman ang hashtag nga #NasaanAngPangulo sang damlag lang.
