ILOILO CITY – Ginkumpirma ni Iloilo City Mayor Jerry Treñas nga nakasapol siya kanday anay Councilors Plaridel Nava, Joshua Alim kag Chief of Staff Jonas Bellosillo kag naistoryahan ang may kaangtanan sa pagpadalagan sa syudad.
Sa interview sang Bombo Radyo kay Mayor Treñas, iya ginpahayag nga gin-isturyahan nila kun mapadalagan pa sanday Nava kag Alim sa pulitika kag maupod ang mga ini sa iya nga partido.
Nahibaluan nga madugay na ang inaway ni Treñas kag Nava tuhoy sa pulitika apang sang damlag lang nag-ayuhay na ang mga ini.
Suno sa Alkalde wala man niya ginpersonal ang pag-initay nila ni Nava kag madugay na siya sa pulitika gani anad na siya sa sini nga mga hitabo.
Samtang, ginpahayag naman ni Former Councilor Plaridel Nava nga mapadalagan lang siya sa liwat kun wala na si Iloilo City Lone District Representative Jamjam Baronda sa grupo ni Mayor Treñas.
Suno kay Nava indi niya mapatawad ang ginhimo nga pagtraidor sa iya ni Baronda bangud ginpalangga man niya ini bilang abyan apang wala ini maka-ekspektar sa himuon sa iya.
Pahayag ni Nava nga mahimo niya ini mapatawad kun makita niya nga mapirdi ini sa pagpadalagan kag magabalik sa basura.
