ILOILO – Nagpaguwa sang Executive Order 183-F si Iloilo Governor Arthur Defensor Jr. sa diin mapalawig ang Modified General Community Quarantine (MGCQ) sa probinsya sang Iloilo.
Sa interview sang Bombo Radyo kay Defensor, iya ginpahayag nga samtang wala pa nakapaguwa sang bag-o nga pagsulundan ang Regional Inter-Agency Task Force (IATF), mapabilin ang probinsya sa nasambit nga quarantine classification.
Suno kay Defensor, yara pa ang COVID-19 pandemic kag bisan manubo ang classification padayon nga nagadugang ang kaso ilabi na nga nagapadulong ang Paskwa.
Pahayag sang gobernador nga kinahanglan ang bulig sang mga alkalde sa Iloilo kag Philippine National Police agud dumilian ang pumuluyo sa public gathering tubtob sa katapusan sang tuig 2020.
