ILOILO CITY – Dakop ang isa ka ginaalegar bigtime online scammer sa ginpatigayon nga entrapment operation sang Criminal Investigation and Detection Group.
Ang nasambit nga scammer amo si Marie Trexie Joguilon, 31, residente sang Barangay Ungka II, Pavia, Iloilo.
Sa exclusive interview sang Bombo Radyo kay Police Major Jess Baylon, pinuno sang Criminal Investigation and Detection Group Iloilo City Field Unit, iya ginpahayag nga madamo na ang nabiktima sang nasambit nga scammer.
Suno kay Baylon, nagapakuno-kuno si Joguilon bilang isa ka employer sa diin nagatanyag ini sa mga biktima nga mag-apply online bilang kitchen staff sa isa ka kilala nga restaurant sa syudad sang Iloilo.
Pahayag ni Baylon, ginpabayaran sang suspek ang lakip sa mga requirements kaangay sang medical examination, uniform kag swab test agud makasulod sa trabaho.
Dugang pa sang natungdan nga lakip sa mga nagreklamo ang sang nagligad pa nga tuig nabiktima kag dako na nga kwarta ang nakuha sang suspek.
Sa subong may yara apat ka complainant nga mapasaka sang kaso kag may walo pa nga nabiktima nga magareklamo man.
Samtang, ginpahayag naman sang isa ka biktima nga nascam man ini pinaagi sa social media sa diin ginpabayad ini sang kwarta para sa medical apang pagkatapos magbayad, wala na niya makita pa ang suspek.
Ang biktima sang scam amo si alyas “Che”, isa ka service crew, residente sang Deca Homes Pavia, Iloilo.
Sa interview sang Bombo Radyo kay Che, iya ginpahayag nga sang nagligad nga tuig pa siya nascam sa diin nakuhaan siya sang P1, 500 para sa ginpahayag nga medical examination agud makasulod man siya sa trabaho.
Suno kay Che, kapin walo sila kabilog nga ginscam sang suspek kag lunsay sila nga nakuhaan sang kwarta.
