Mahimo sa gihapon maka-apply sa COVID-19 Adjustment Measures Program (CAMP) sang Department of Labor and Employment (DOLE) ang mga wala pa nakabalik sa ila trabaho bangud apektado sang pandemya.
Sa interview sang Bombo Radyo kay Niezel Sabrido, spokesperson sang Department of Labor and Employment Region VI, iya ginpahayag nga dapat lang bisitahon sang mga maga-apply nga mga indibidwal ang Facebook page nga DOLE Region VI.
Dapat man nga may yara sang ginakaptan nga government-issued ID kag may ipakita nga certificate ukon affidavit of employment.
Online lang ang transaksyon suno kay Sabrido.
Sa subong suno kay Sabrido, padayon ang pagpanagtag sang ayuda sa kwalipikado nga mga indibidwal sa idalom sang CAMP program kag Tulong Panghanapbuhay sa Ating Disadvantaged/Displaced Workers (TUPAD) Program.
Santo sa latest data sang talatapan, kapin P50 million na ang narelease sa CAMP ukon para sa mga nadulaan sang trabaho bangud sang COVID-19 pandemic; samtang kapin P2 million sa TUPAD nga para naman sa informal settler workers.
Samtang ginahulat pa sang talatapan kun pila na ang unemployment kag underemployment rate sa Rehiyon VI.
Kun basehan ang Abril 2020 nga data sang Philippine Statistics Authority Western Visayas suno kay Sabrido, 13.7% ang unemployment rate sa rehiyon.
Ini ang ginalauman nga maganubo ilabi na bangud amat-amat naman nga nagbukas ang ekonomiya kag naghalog naman ang quarantine restrictions.
Nahibaluan nga santo sa latest preliminary results sang Philippine Statistics Authority’s quarterly labor force survey (LFS), naglab-ot na sa 4.5 million ka mga Fiipinos ang nadulaan sang trabaho subong nga 2020 bangud sang pandemya kag bangud sang ginpatuman nga mga lockdown nga nakaapekto sa mga negosyo sa Pilipinas.
