ILOILO CITY- Dismayado si anay Iloilo 5th district Congressman Niel Tupas Jr. sa liderato sang iya utod nga si Congressman Raul ‘Boboy’ Tupas sa quinto distrito.
Sa interview sang Bombo Radyo sa anay kongresista, iya ginpahayag nga base sa feedback sang mga pumuluyo gikan sa 301 ka kabarangayan sa bilog nga fifth district, wala niya nakit-an ang sahi sang liderato kag serbisyo nga ginbilin sa ila sang ila amay nga si anay Iloilo Governor Niel Tupas Sr.
Suno sa anay mamalidha, ang isa ka kongresista ang dapat nga may ikasarang sa pagbalay sang mga laye kag nagakadapat nga yara ang presensya sa mga pumuluyo kag wala lang nagahulat sa opisina.
Ginpahayag naman sang natungdan nga wala siya nagakadulaan sang paglaum nga magbalik ang maayo nga liderato kag panghimanwa sa nasambit nga distrito.
