Tuman kalayo ang selebrasyon sang Paskwa sa pungsod Rwanda ipaanggid sa naandan sang mga Pinoy sa Pilipinas.
Ang Rwanda ang isa ka landlocked country sa Central Africa kun sa diin Kristiyano man ang kalabanan nga mga pumuluyo.
Suno kay Bombo International Correspondent Jonelyn Jardeleza Lim direkta sa Kigali ukon capital city sang Rwanda, ang tipikal nga Rwandan Tradition para sa Paskwa ang wala nasentro sa Simbang Gabi, pagkaon sang lechon kag mga hamon, ukon dalagku nga mga pagtililipon.
Wala man sang dalagku kag madamo nga Santas, reindeer, kag Christmas trees.
May mga Rwandans suno sa iya nga naanad man sa paghatag sang mga regalo, apang indi gid kaangay sa Pilipinas kun sa diin ginapaabot gid ang paghinatagay sini nga mga regalo.
Sa adlaw sang Paskwa, nagapadulong man ang mga residente sa Simbahan kag nagapangamuyo.
Subong nga may COVID-19 pandemic, mas nangin limitado ang hulag sang mga tawo gani duha-duha pa kun madayon ang Christmas parties sa mga opisina.
Tubtob 10:00 sa gab-i lang ang mga bars and establishments nga nakahiligan sang mga tawo.
Agud mabatyagan ang selebrasyon sang Paskwa kaangay sa Pilipinas, natalana man nga magatipon ang Filipino community sa Kigali agud magselebrar kag magkaon sang ila paborito nga Filipino food ilabi na sang lechon.
