Emosyonal nga ginsaysay sang isa sa mga witness ang natabo nga pagluthang patay sa mag-iloy sa Paniqui, Tarlac.
Ang mga biktima amo sanday Sonya Gregorio, 52 nga amo ang iloy kag anak sini nga si Frank Anthony Gregorio, 25, residente sang Barangay Cabayaoasan, Paniqui, Tarlac.
Samtang ang nangluthang naman nga pulis amo si Police Senior Master Sgt. Jonel Nuezca, naka-destino sa Parañaque City Crime laboratory unit.
Nahibaluan nga nag-viral ang video sang mga biktima kaupod ang suspek kag ang iya anak samtang nagabaisay tubtub ginpatay sang pulis ang mag-iloy.
Suno sa witness nga si Alyssa Calosing, ginsulong mismo sang pulis kag sang iya anak ang mag-iloy nga Gregorio.
Ginpahayag ni Calosing nga madamo sang mga nagapugong sa pulis, apang wala ini nag-untat tubtub nagkalagisi ang shorts ni Frank Anthony Gregorio.
Magluwas sini, ginguramos pa sang anak sang pulis nga si Elisha Nuezca si Sonya Gregorio kag ginsinggitan nga pulis ang iya amay.
Apang ginsabat siya si Sonya Gregorio nga wala siya sang labot.
Ang malain pa suno sa natungdan, bangud matapos ang krimen, daw kaangay nga wala lang sang labot sa natabo ang pulis kag ang iya anak.
Kaangot sini, ginmando ni anay Philippine National Police (PNP) chief kag subong Sen. Panfilo Lacson sa mga PNP leaders nga indi pagkaluuyan ang uniformed personnel nga nagluthang patay sa mag-iloy.
Suno kay Lacson, nagakadapat nga himuon sang mga otoridad ang tanan nga paagi agud mapreso si Nuezca.
Natukiban man suno sa senador nga wala naka-duty ni Nuezca sang ginhimo ang krimen.
Ginpanugyan man sang senador nga nagakadapat nga iturn-over sang isa ka pulis ang ila issued firearms sa ila supply officer sa tion nga naka off duty na ang mga ini.
Nagakadapat man suno kay Lacson nga indi paghatagan sang Permit to Carry Firearm Outside Residence para sa personal nga armas ang mga pulis nga aktibo pa sa serbisyo.
Samtang suno naman kay Department of Interior and Local Government Sec. Eduardo Año, indi sala sang bug-os nga hanay sang PNP ang ginhimo ni Nuezca.
Sa pagkamatuod suno sa tiglikom ang mga pulis ang nagapanguna subong sa COVID-19 relief efforts.
Matandaan nga nagsungka na si Nuezca sa Rosales Municipal Police Station matapos ang krimen.
Ginturn-over man niya ang 9mm Beretta pistol nga amo ang gingamit sa pagpatay sa mag-iloy.
Magluwas sini, ginsurrender man ni Nuezca, ang iya PNP ID kag 9 live ammunition.
Samtang suno kay Lt. Col. Noriel Rombaoa, hepe sang Paniqui Police Station, nagwa sa ila imbestigasyon nga ginsita sang pulis ang mga biktima nga ila man lang tupad-balay bangud sa pagpalupok sang boga.
May daan na nga hiligut-anon ang magkasilingan bangud sa right of way apang nahitso man ini sa ila barangay.
Sa subong, ginsaylo na sa Paniqui Municipal Police ang suspek.
