Gin-athag sang Integrated Bar of the Philippines nga kinamatarong sang publiko ang pagkuha sang laragway kag video sa mga krimen nga nagakatabo sa palibot.
Suno kay IBP president Domingo Cayosa, makabig nga sahi sang “public offense against the country” ang isa ka krimen.
Kun ikomiter ini sang isa ka tawo, indi na dapat pagkwestyunon ukon i-cite ang iya nga right to privacy.
Suno pa kay Cayosa, indi iligal ang pag-document sa isa ka krimen.
Ini nga statement sang IBP ang kasunod sang natabo sa Paniqui, Tarlac kun sa diin ginluthang-patay ni Police Senior Master Sergeant Jonel Nuezca ang mag-iloy nga sanday Sonya Gregorio, 52, kag anak nga si Frank Anthony Gregorio, 25, lunsay residente sang Barangay Cabayaoasan, Paniqui, Tarlac.
Kasunod sini, nag-viral sa social media ang video sang krimen kag naglupok ang kaakig sang mga netizens sa pagpangluthang nga ginhimo sang pulis.
Suno naman kay Cayosa, nahangpan niya ang panindugan ni Philippine National Police chief Police General Debold Sinas nga gina-discourage ang publiko sa pagkuha sang mga laragway kag videos bangud mahimo sini mabutang sa risgo ang ila kabuhi bilang mga witnesses.
Apang suno sa natungdan, pahanumdom lang sa publiko ang dapat nga himuon sang otoridad apang indi dapat pagdumilian ang mga tawo sa pagkuha sini nga mga laragway kag videos.
Ang pagdokumento sa krimen suno kay Cayosa ang isa ka paagi agud nga masilutan ang sin-o man nga nagahimo sang krimen.
