DINGLE, ILOILO – Patay ang mag-utod nga lalaki nga lunsay menor de edad matapos nalumos sa suba sa Dingle, Iloilo.
Ang mga biktima amo sanday Mike Glenn Pelingon, 10, kag Jonex Pelingon, 9, lunsay residente sang Barangay Calicuang sa amo nga banwa.
Sa interview sang Bombo Radyo kay Police Staff Sergeant Leo Ron Anerdes, imbestigador sang Dingle Municipal Police Station, iya ginpahayag nga nag-upod ang duha ka bata sa ila amay sa paghugas sang iya nga motorsiklo sa higad sang suba.
Suno kay Arnedes, naghampang ang duha ka bata kag nagpaligo sa suba kag ulihi na natalupangdan sang amay nga wala na sila sa iya nga tupad.
Posible suno sa amay nga nahulog sa madalom nga bahin sang suba ang duha.
Sang ginpangita, nakit-an ang mag-utod nga nagakup-anay sa madalom nga bahin sang suba.
Ginhingagaw pa dala sa ospital ang duha ka biktima apang gindeklarar nga dead on arrival.
