Nagsaka na sa 27 ang narekord nga kaso sang COVID-19 sa Department of Health Region VI.
Sa interview sang Bombo Radyo kay Dr. Mary Jane Juanico, COVID-19 spokesperson kag pinuno sang Infectious Disease Section sang DOH Region VI, iya ginpahayag nga 11 sa sini nga mga pasyente ang naka-admit kag ang nabilin ang nagabatyag sang mild symptoms.
Kalabanan sa mga infected nga pasyente ang naghalin sa surveillance kag technical team sang talatapan.
Kapin 50 porsyento na sang mga empleyado ang natigayon nga mapaidalom sa swab test.
Ginauna sa swab test ang mga symptomatic ukon may mga sintomas sang balatian.
Indi pa matumod kun sa diin gid naghalin ang virus apang ginatan-aw nga communit-acquired ini ukon nakuha sa komunidad bangud may mga importante man nga face-to-face meetings nga natambungan ang iban nga mga personnel kag posible ginhalinan sang infection.
Suno pa kay Juanico, wala man napiang ang mga trabaho sa DOH Region VI bangud nagapadayon man ang online meetings kaupod ang mga stakeholders lakip na ang mga local government units (LGUs).
