ILOILO – Positibo ang local government unit sang Cabatuan nga makapasar ang banwa sa validation para sa pagpanghawan sa dalanon ukon road clearing operations.
Sa interview sang Bombo Radyo kay Cabatuan Mayor Ronilo Caspe, iya ginpahayag nga kun basehan ang inisyal nga validation sang Disyembre 2020, nagdangat na sa kapin 90% ang ila nga score.
Suno kay Caspe, sa subong, padayon ang trabaho sang taskforce sa pagpangurit sa mga dalanon agud mahibaluan sang mga driver ang designated nga mga parking space kag kun diin sila indi mahimo maka-park sang ila salakyan
Magluwas diri, may mga gin-deputize naman nga opisyal nga amo ang may otoridad sa pagsaway sa mga tawo nga nagabutang sang sablag sa dalan.
May 9 man ka mga barangay halls nga natumod nga obstruction; sa siyam ka barangay halls, isa na ang ginguba, duha ang ginpangitaan sang lain nga lugar, kag para sa nabilin nga numero, naghingyo ang LGU sa Department of the Interior and Local Government nga hatagan sila sang exception.
Ini bangud suno sa alkalde, may isa pa man ka metro ang kalayuon sang barangay halls sa karsada kag mahimo pa man makaagi ang tawo sa sidewalks.
Matandaan nga naghatag ang DILG sang isa ka semana nga extension sa deadline sang Road Clearing Operations 2.0 kasunod man sang mga hingyo sang LGUs.
Sa baylo nga Enero 15, ginsaylo sa Enero 22 ang deadline kag maga-umpisa naman ang validation sa Enero 25.
