Ginpamatbatan sang 43 ka tuig nga pagkapreso ang isa ka 65 anyos nga babaye sa Thailand bangud sa pag-insulto sa Royal Family.
Ini na ang ginakabig pinakadaku kag pinakamalawig nga sentensya nga nabaton sa amo nga pungsod bangud sa pagpakalain sa monarkiya.
Ang nasentensyahan amo si Anchan Preelert nga ginapahayag nag-post kag nag-share sang clips sa YouTube kag Facebook sang 2014 kag 2015.
Suno sa abogado nga si Pawinee Chumsri, 87 ka tuig gid nga pagkapreso ang una nga silot para kay Anchan apang bangud gin-ako niya ang iya nga violation, gintunga na lang ang kalawigon sini.
Ang desisyon sang korte batok kay Anchan ang ginpagwa sa tion nga may yara man sang mga lapnagon nga protesta sa Bangkok, Thailand kun sa diin wala sang kahadlok ang mga tawo sa pagpakamalaot sa monarkiya.
Sa idalom sang layi sang Thailand ukon lese majeste, ginakabig nga iligal ang pag-insulto sa sin-o man nga miyembro sang Royal Family; ang madakpan nga nagalapas sa sini nga pagsulundan ang magapangatubang sang 15 ka tuig nga penalidad.
