Gin-athag sang Bangko Sentral ng Pilipinas – Iloilo nga indi pa para sa circulation ang bag-o nga P5,000 banknote nga nagapakita sang imahe ni Lapu-lapu.
Sa interview sang Bombo Radyo kay Lowen Andrew Jun Ligad, bank officer III sang Bangko Sentral ng Pilipinas – Iloilo, iya ginpahayag nga commemorative banknote lang ini agud pasidunggan si Lapu-lapu kag dumdumon ang ika-500 ang anibersaryo sang iya pagdaug sa away sa Mactan ukon mas kilala nga Battle of Mactan.
Sa amo nga P5,000 bill, makit-an man ang Philippine Eagle sa likod kag may usual security features kaangay man sa iban nga piso banknotes.
Natalana pa nga mag-isyu sang separado nga advisory ang BSP sa bulan sang Marso may kaangtanan sa gusto magbakal sang nasambit nga commemorative banknote.
