Temprano nga preparasyon kag paghugpong ang rason kun ngaa all-systems-go na ang mga mayor nga aktibidad para sa Digital Dinagyang 2021 subong nga semana.
Sa interview sang Bombo Radyo kay Atty. Joebert Peñaflorida, presidente sang Iloilo Festivals Foundation Incorporated (IFFI), iya ginpahayag nga nahitso na ang tanan nga mga mga performances kag handa na nga ipakita sa publiko, sa Iloilo man sila ukon sa luwas sang pungsod.
Ginpasalamatan man ni Peñaflorida ang working committees, choreographers, kag Ilonggo artists nga nagpangabudlay para sa Dinagyang Festival.
Ang syudad sang Iloilo lamang ang nagaisahanon nga lugar sa pungsod nga nakapatigayon sang sini kadaku nga festivity apisar sang COVID-19 pandemic.
Bangud sini, ginpahayag ni Peñaflorida nga ginapanan-aw nga mangin trendsetter ang Iloilo City kag mahimo man ilugon sang iban nga mga syudad kag probinsya kun magpatigayon sila sang ila nga mga aktibidad gamit ang nanuhay-tuhay nga social media platforms.
Yari ang dalagku nga aktibidad nga balantayan sang publiko:
Enero 22 — Sto. Nino Religious Motorcade nga magaumpisa 2:00 sa hapon;
Enero 23 — Dinagyang sa Calle Real Time nga maga-umpisa 9:00 sa aga;
— Virtual Religious Sadsad nga maga-umpisa 6:00 sa gab-i; kag
Enero 24 — Virtual Dinagyang Mass kag One Dinagyang Digital
Tanan nga presentasyon sang Dinagyang Festival 2021 ang mahimo malantaw sa Facebook page sang Bombo Radyo kag mahimo man makit-an kag mabatian paagi sa www.bomboradyo.com, ang official website sang Bombo Radyo Philippines, ang Pambansang Radyo ng Pilipinas.
