Ginpat-od sang Iloilo Festivals Foundation Incorporated (IFFI) nga mabatyagan sang mga Ilonggo ang Dinagyang vibe paagi sa pagpatigayon sang Dagyang sa Calle Real Time.
Sa interview sang Bombo Radyo kay Aldene Duyag, chair sang Dagyang sa Calle Real Time committee sang IFFI, iya ginpahayag nga may tatlo ka segments nga ipresentar sa mga tumalan-aw nga mahimo nila ma-enjoy bisan yara lang sila sa ila nga balay.
Ini nga mga segments amo ang Kia-y-kiay sang Lin-ay, Patisoy ni Nonoy, kag Merry making.
Sa Kiay-kiay ni Inday, lima ka babaye nga participants ang mapaindis-indis samtang nagasaot sa kanta nga Hala Bira; samtang lima man ka lalaki ang magapaindis-indis sa segment nga Patisoy ni Nonoy.
Sa Merry making, isa ini ka group contest kun sa diin lima ka grupo ang magasaot sa kanta nga Hala Bira nga nagarepresentar gid sang pagdagyang sang tawo sa kinaandan nga Dinagyang Festivals.
Gin-athag ni Duyag nga na-shoot na ini nga mga performances kag ipakita na lang virtually sa Enero 23 umpisa 9:00 sa aga.
Ang Dagyang sa Calle Real Time ang sarang man nga malantaw sa Facebook live sang Bombo Radyo Iloilo kag mahimo man makit-an kag mabatian sa www.bomboradyo.com, ang official website sang Bombo Radyo Philippines.
