ILOILO CITY – Indi matupungan ang kalipay sang mga choreographers sang pito ka mga tribu sang pito ka mga distrito sa syudad sang Iloilo sang natapos na ang ila nga presentasyon sa highlight sang Digital Dinagyang.
Sa interview sang Bombo Radyo kay Gerlin Francisco, choreographer sang Tribu Lapuz, iya ginpahayag nga sa kapin 16 ka tuig na niya nga pagtrabaho sa patag sang choreography, ini ang pinakalain nga aktibidad kun sa diin madamo nga mga adjustments ang ila ginhimo.
Limitado man ang hulag bangud sang mga restrictions nga ginapatuman sang IATF.
Full time choreographer gid si Francisco kag isa man sa apektado sang ginpatuman ang lockdown bangud ginsuspinde ang tanan nga dalagku nga mga live events lakip na ang festivals.
Matapos ang kapin 9 ka bulan nga pagproblema kun makabalik pa sa normal ang ila trabaho, ang Digital Dinagyang na ang ila ginakabig nga break kag ginalauman nga makabukas man sang dugang nga oportunidad para sa Ilonggo artists.
Emosyonal naman si John Paul Patrimonio, choreographer sang Tribu Jaro, bangud sa leksyon kag mga eksperyensya nga dala sang Digital Dinagyang.
Suno kay Patrimonio, indi mabayluhan ang ila kalipay bangud sa pihak sang pandemya, nangisog ang Iloilo City nga dayunon ang Dinagyang Festival nga amo man ang nakabuhi sang paglaum sang mga Ilonggo artists sang sila ang nadulaan sang trabaho.
Nagpahayag si Patrimonio nga sang ginpatuman ang lockdown, wala na halos sila nakahibalo kun ano ang himuon bangud indi pa sila makabalik sa ila kinaandan nga ginakuhaan sang income.
Nagalaum si Patrimonio nga ini na ang mangin pamuno sang dugang nga mga oportunidad para sa ila nga mga Ilonggo artists indi lang diri sa Iloilo kundi mangin sa gwa sang Western Visayas.
