ILOILO CITY – Nagkomiter ang Land Transportation Office Region VI nga magatambong na ang ila nga tiglawas sa patigayunon nga ikaduha nga consultative meeting sang Iloilo City Council may kaangtanan sa kotrobersyal nga Private Motor Vehicle Inspection Center System.
Sa interview sang Bombo Radyo kay Atty. Allan Sacramento, designated spokesperson sang LTO Region VI, iya ginpahayag nga siya mismo ang magatambong sa pagsinapol bwas, Pebrero 10.
Kahapon, Pebrero 8, sang nabaton ni Sacramento ang sulat sang imbitasyon nga halin kay Iloilo City Councilor Atty. Rommel Duron, ang chair sang Committee on Transportation.
Antes magtambong sa meeting, kadtuan anay ni Sacramento ang PMVIC sa Roxas City, Capiz subong nga adlaw agud nga makatuon sang dugang kag masabat niya ang mga palamangkutanon sang mga konsehal kag mga tiglawas sang transport groups.
Nagalaum naman si Councilor Atty. Duron nga sini nga tion, madayon na gid ang taga-LTO Region VI sa pagtambong sa pagsinapol sa Iloilo City Council.
Sa interview sang Bombo Radyo kay Duron, iya ginpahayag nga pormal sila nga nagpadala sang imbitasyon gani pormal man nga sabat ang ila ginalauman bangud obligasyon sang LTO nga ipahangop sa publiko ang PMVIC system.
May kaangtanan sa una nga natabo kun sa diin wala sang bisan landong nga ginpakita ang taga-LTO Region VI sang Pebrero 5, ginpahayag ni Duron nga kun may miscommunication man ukon internal nga problema ang LTO, gwa na diri ukon wala na sang labot ang konseho sang syudad.
