Indi dapat paghimuon nga big deal para sa isa ka Miss Universe Candidate ang iya social media activities.
Ini ang reaksyon sang blogger kag pageant expert nga si Norman Tinio may kaangtanan sa nagagwa nga mga pahayag nga kulang ang exposure para kay Miss Universe Philippines 2020 Rabiya Mateo apisar nagahilapit na ang Miss Universe pageant.
Sa interview sang Bombo Radyo kay Tinio, iya ginpahayag nga kun kaisa daw wala na sang lugaran ang mga beauty queens bangud sa lain-lain nga mga komento sang tawo sa social media.
May yara sang beauty queens nga may mga pasabog sa photoshoot, kag may yara man nga lowkey lang suno kay Tinio.
Ang importante suno kay Tinio amo nga handa si Rabiya sa international pageant.
Suno kay Tinio, masarangan ni Rabiya ang mangibabaw indi lamang sa katahum kundi paagi man sa iya kaalam nga pwede mangin spokesperson sang organization.
Bold and outspoken si Rabiya suno kay Tinio kag may yara sang ‘mind of her own’.
Ginakabig man nga mabaskog nga kasumpong ni Rabiya sanday Miss Universe South Africa Natasha Joubert kag Miss Universe Thailand Amanda Obdam.
Una na nagwa sa reports nga sa Mayo 16 patigayunon ang Miss Universe pageant sa Estados Unidos.
