ILOILO CITY – Maswerte nga nakaluwas ang isa ka lalaki matapos ginluthang sang riding-in-tandem suspects sa Brgy. Cuartero, Jaro, Iloilo City.
Ang biktima amo si Jerome Paegane, ginabanta 40 anyos ang edad, residente sang Brgy. Fajardo sa amo man nga distrito.
Sa interview sang Bombo Radyo kay Pol. Lt. Col. Reuben Siason, hepe sang Jaro Police Station, iya ginpahayag nga nagatindog sa gwa sang isa ka balay ang biktima sang ginpalapitan sang duha ka lalaki nga nakasakay sa isa ka itom nga motorsiklo, nagasuksok sang itom nga jacket, may helmet, kag may face mask.
Ginapahayag nga nagaatubang ang biktima kag nakita nga may dala nga armas ang isa sa mga suspek rason nga madasig nga nakalikaw.
Isa ang lupok nga nabatian kag nag-igu naman sa natu-o nga bahin sang lawas sang biktima.
Ginatinguhaan pa sang otoridad nga makasecure sang recording sang closed circuit television malapit sa lugar nga ginluntaran sang insidente.
Sa inisyal nga pagpangusisa sang Jaro PNP, wala man sang daan nga rekord ang biktima kag indi man drug surrenderer.
Indi pa matumod sang mga pulis ang motibo sang krimen.
