Naghingyo ang Department of Public Works and Highways Region VI sa local government unit sang Pavia, Iloilo sang kapin isa ka semana nga road closure agud nga mahatagan ligwa ang pag-install sang girders nga kinahanglanon para sa nagapadayon nga pagtukod sang Ungka Flyover.
Sa sulat nga napetsahan Marso 2, naghingyo si DPWH Regional Director Lea Delfinado kay Pavia Mayor Laurence Anthony Gorriceta nga siraduhan ang dalan halin sa U-turn slot malapit sa exit sang Christ the King sa Barangay Ungka II, Jaro, Iloilo City padulong sa intersection sang Circumferential Road sa Barangay Ungka II, Pavia, Iloilo.
Ang road closure ang magaumpisa sa Lunes, Marso 15, tubtob Domingo, Marso 21, umpisa 7:00 sa aga tubtob 5:00 sa hapon.
Yari ang proposed alternate route para sa mga commuters halin sa Sta. Barbara kag Pavia nga magapadulong sa Iloilo City:
1. Circumferential Road to Barangay Tacas -Quintis Salas -Jaro Plaza
2. Circumferential Road to Barangay Tacas – Buhang – Jaro Plaza
3. Circumferential Road to Barangay Hibao-an Mandurriao
4. Pavia – Barangay Tacas – Quintin Salas- Jaro Plaza
5. Pavia – Barangay Hibaoan (sa Bangga Singko) – Mandurriao
Yari naman ang proposed alternate route para sa mga commuters nga magahalin sa Iloilo City kag padulong sa Sta. Barbara:
1. Jaro – Quintin Salas -Barangay Tacas – Pavia Road
2. Jaro – Circumferential Road – City Mall Pavia – Pavia
3. Jaro – Mandurriao – Hibaoan – Circumferential Road – Pavia
Sa interview sang Bombo Radyo kay SB Member Pyt Trimañez, chair sang Committee on Transportation sa Sangguniang Bayan, iya ginpahayag nga may guba sa mga pila ka mga dalan nga yara sa proposed alternate route nga ginplastar sang DPWH Region VI.
Magasulat pa si Mr. Jeck Conlu, pinuno sang Public Safety and Transportation Management Office sang Iloilo City, sa DPWH Region VI agud athagon ang amo nga concern.
Ginalauman nga makasapol liwat ang mga tiglawas sang DPWH Region VI, PSTMO sang Iloilo City, kag Committee on Transportation sa masunod nga semana.
