ILOILO – Malayo ang maabtan sang tawo nga may handum. Masarangan niya usuyon ang lubak-lubakon nga dalanon kag madangtan ang lugar nga sang una daw kalayo gid kun tulukon.
Ini ang ginapamatud-an ni MJ Solitana, 37-anyos nga artist nga tumandok sang Sta. Barbara, Iloilo. Nabun-ag si MJ nga may paraplegia, isa ka sahi sang paralysis nga nagaapekto sa naidalom nga bahin sang iya lawas. Indi siya makalakat kag nabudlayan siya maghulag sang iya nga tiil.
Sa interview sang Bombo Radyo kay MJ, iya ginpahayag nga sang gamay pa siya, masami nga siya lang ang bilin sa ila nga balay bangud naga-bulante sang tobacco ang iya iloy kag nagapamanday ang iya amay. Sa 12 nga mag-ulutod, pang-11 si MJ.
Papel kag lapis lang ang masami nga kaupod ni MJ agud nga mapalipas niya ang oras. Bangud sang iya kondisyon sa lawas, wala man siya nahatagan sang oportunidad nga maka-eskwela.
“Syempre diri lang ko sa balay, feeling ko useless ako,” sabat ni MJ kun ngaa ‘sadness’ ang theme sang iya drawings sang una. “Wala man ako istoryahon. Sila (kabataan), gaeskwela. Nanay ko, nagabulante. Tatay ko, nagapamanday. Feeling ko dira (drawings) ko maexpress ang akon nga kaugalingon kay indi ako makagwa.”
Nagmato-mato si MJ nga makatuon paagi sa available lang nga educational materials sa ila balay. Sang 2015, labi pa nga nag-uswag ang abilidad ni MJ. Natun-an niya nga butangan sang duag ang iya nga drawings.
“Ara gid ang nanay ko nga siling ya, ‘sigeha lang imo art kay malay mo magsikat ka.’ Siling ko, ‘ngaa masikat ko kay ang art ko pangbata lang?’ Pero ulihi ko na sang nahibaluan nga insakto gid man siya,” pahayag ni MJ.
Nag-umpisa nga magsikat ang mga artworks ni MJ kag naka-income pa siya bangud may mga tawo nga nagabakal sini. Apang gin-athag niya nga wala siya naga-commission agud ‘indi man mauyang kun indi maluyagan sang customer.’
“Nakalab-ot na akon art works sa Japan kag Indonesia,” pahayag ni MJ sa bulig man sang pila niya na kakilala.
Gina-idolo ni MJ ang iya mentor nga si Alex Ordoyo, isa ka visual artist kag teacher halin sa Santa Barbara, Iloilo nga may yara man sang artworks nga watercolor on paper, textured acrylic, kag oil on canvas.
Sa bulig sang iya artworks, na-overcome ni MJ ang iya ginabatyag bangud sang iya kasablagan.
“Ang gapadugang inspirasyon sa akon…syempre si God. Kada bugtaw ko sa aga, naga-pray ako, ‘Thank God for another life’ kag manami ang modo ko nga maka-paint.”
Handum man niya nga makatukod gid sang iya kaugalingon nga art gallery.
“Dapat nga positive lang kita. Kun ano ang maobra sang iban, maobra man naton ina,” mensahe ni MJ sa iban nga mga babaye subong nga Women’s Month.
