ILOILO CITY – Nagahimo sang nanuhay-tuhay nga diskarte ang mga barangay sa syudad sang Iloilo agud mas madamo nga pumuluyo ang makumbinse nga magpabakuna batok sa COVID-19.
Sa Barangay Pali Benedicto, Mandurriao, Iloilo City, ginpahayag ni Punong Barangay Allan Juarez nga mas madamo sa gihapon nga mga pumuluyo ang nagapangindi sa bakuna.
Sa interview sang Bombo Radyo kay Juarez, iya ginpahayag nga kalabanan sa naga-Huo sa vaccination amo lang ang mga tawo nga may background sa medical profession.
Suno kay Juarez, nagapatigayon sila sang house-to-house campaign kag ginabalikan gid ang mga residente nga nagapang-alang-alang sa pagpabakuna.
Sa Barangay Guzman Jesena, Mandurriao, ginapahayag nga masobra na sa tunga sang populasyon ang sugot nga magsuporta sa vaccination.
Sa interview sang Bombo Radyo kay Punong Barangay Roseller Paredes, iya ginpahayag nga ginbalik-balikan gid nila ang mga pumuluyo tubtob nga mapahangop nga limitado lang ang bakuna gani indi dapat pag-uyangan ang tsansa nga ma-avail ini sang libre.
Kada zona ang kampanya sang mga barangay officials kag may gindesignar gid nga in-charge sa kampanya.
Suno kay Paredes, naubusan lang sila subong sang vaccine consent forms apang liwat ini nga ipanagtag agud nga masigurado kun sin-o na ang kumporme sa pagpabakuna.
Sa Barangay Benedicto, Jaro, Iloilo City, ginpahayag man ni Punong Barangay Abelardo Salting nga wala nagauntat ang mga barangay officials sa pag-edukar sa mga pumuluyo angot sa vaccination.
May mega phone pa nga ginadala ang chairman sang Committee on Health para sa public address kag may leaflets nga ginapanagtag para sa dugang nga mga impormasyon sang publiko.
Activated man ang Facebook page sang barangay agud nga mabisitahan sang mga tawo nga may pamangkot tuhoy sa vaccination.
