ILOILO CITY- Ginpakamalaot sang Confederation for the Unity, Recognition, and Advancement of Government Employees (COURAGE)- Panay ang pagdeklarar sang Department of Interior and Local Government nga front sang komunista ang amo nga grupo upod man ang Alliance of Concerned Teachers ukon ACT.
Sa interview sang Bombo Radyo kay Hernan Buenaventura, chairman sang COURAGE- Panay, iya ginpahayag nga indi nila mahangpan kon ngaa nga front sang mga rebelde ang pagkabig sang DILG sa ila.
Suno kay Buenaventura, sa sulod sang masobra tatlo ka dekada umpisa sang natukod ang COURAGE, nangin instrumento lamang ini sang pagdihon sang mga asosasyon sang mga empleyado sa gobyerno kon sa diin may yara sang kasugtanan sa tunga sang mga associations kag mga ahensya.
Dugang pa sang natungdan, sa pagkamatuod, nagapatigayon sila sang rally indi agud pakalainon ang gobyerno kundi agud nga magpalayag lang sang ila kawsa.
Nagpahayag man sang pagkabalaka si Buenaventura kasunod sang tikang sang DILG bangud mahimo gamiton ini sang lawless elements sa sosyodad agud halitan ang ila grupo kag ang gobyerno ang mabasulan.
Nahibaluan nga nasaad sa memorandum sang DILG nga pirmado ni DILG Asst. Secretary Alexander Macario nga imbestigahan ang infiltration sa mga ahensya sang gobyerno sang communist terrorist group front organization nga COURAGE kag ACT kag pahalinon ang mga empleyado nga may kaangtanan sa terorista nga grupo.
