ILOILO CITY – Nagrekomenda ang Iloilo City Government sa mga call centers sa syudad sang Iloilo nga magpatigayon sang random COVID-19 testing sa ila nga mga empleyado.
Ang rekomendasyon ni Iloilo City Mayor Jerry Treñas ang kasunod sang nagtimbuok nga kaso sang COVID-19 nga narekord sa Hinduja Global Solutions nga nahamtang sa SM Strata sa Senator Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Treñas, iya ginpahayag nga nagapakig-angot na subong ang COVID-19 team sang syudad sa iban nga nga Business Process Outsourcing (BPO) companies agud mapatigayon sang random reverse transcription polymerase chain reaction (RT-PCR) test.
Ginpahanumdom man ni Mayor Treñas sa publiko nga sundon ang tanan nga ginapatuman nga minimum health protocols agud malikawan ang dugang nga local transmission sang COVID-19.
