PASSI CITY, ILOILO – Matapos ang duha ka bulan nga pahuway bangud sang pagtaas sang numero sang kaso sang COVID-19, liwat nga magapatigayon ang syudad sang Passi sang bloodletting activity agud masabat ang pagkinahanglan sang dugo sa tunga sang pandemya.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga patigayunon ang nasambit nga aktibidad sa Marso 26, Biyernes nga adlaw, sa Passi City Arena.
Kaupod sa bloodletting activity ang Dugong Bombo sang Bombo Radyo Philippines, 301st Infantry (Bayanihan) Brigade sang Philippine Army nga nakabase sa Dingle Iloilo, kag mga personnel sang DepEd- Division of Passi City.
Ginalauman man nga may mga walk-ins man gihapon nga magasuporta sa voluntary blood donation amo man ang pila ka mga grupo halin sa nanuhay-tuhay nga sektor sa amo nga syudad.
Ginapasigurado sang local government unit nga masunod ang tanan nga minimum health protocols batok sa COVID-19.
