STA. BARBARA, ILOILO – Kaso nga murder ang ginpasaka batok sa tatlo ka miyembro sang Philippine Army nga amo ang suspek sa pagluthang-patay kay Jail Senior Inspector Andrew Larupay sa Bangga Dama, Brgy. Bolong Oeste, Sta. Barbara, Iloilo.
Base sa imbestigasyon sang pulis sa natabo nga road rage nga nagresulta sa shooting incident sang Hwebes, Marso 18, nakitaan sang mga sirkumstansya nga qualified sa murder ang mga suspek nga sanday Private First Class Bjourn Kirby Esposo, 26; Staff Sergeant Nelson Sorilla, 40; kag Nilo Silao alias Tata, 47, miyembro sang Citizen Armed Force Geographical Unit (CAFGU).
Sa interview sang Bombo Radyo kay Police Major Raymond Celoso, hepe sang Sta. Barbara MPS, iya ginpahayag nga pito ang igu sang bala nga naangkon ni Larupay: isa sa tuo nga abaga, duha sa ilong, isa sa wala nga bahin sang dughan, isa sa wala nga abaga, isa sa wala nga kamot, kag isa sa likod sang abaga.
Suno kay Celoso, base sa resulta sang autopsy examination, anum sa sini ang entrance wound lakip na ang sa likod ni Larupay.
Ginpahayag ni Celoso nga .45 caliber pistol ang gingamit sa pagluthang sa biktima.
Matandaan nga una na nga nag-ako si Esposo nga siya ang nagpangamot sa pagluthang kag wala nangamot ang iya duha ka upod sa elf truck nga sanday Sorilla kag Silao.
Matandaan man nga una na nga nagpahayag ang isa sa mga nakasaksi sa krimen nga may bitbit man nga armas-luthang si Sorolla sang ginapahayag nanaug ini sa elf truck kaupod si Esposo.
Sa subong, ginahulat pa ang resulta sang ballistic examination kag paraffin test nga gin-conduct sa tatlo ka mga suspek kag amo man sa biktima.
