ANTIQUE – Naka-schedule na sa Lunes, Abril 12, ang COVID-19 vaccination para kay Antique Governor Rhodora Cadiao.
Sa Advisory 26 sang National COVID-19 Vaccination Operations Center, nadala si Cadiao sa anum tanan ka gobernador sa Western Visayas nga gintumod sang Department of Health (DOH) nga pabakunahan batok sa COVID-19 sa idalom sang Priority Group A1.5.
Wala pa sang official document nga ginauyatan si Cadiao apang na-inform na siya sang Antique Provincial Health Office (PHO).
Sa interview sang Bombo Radyo kay Cadiao, iya ginpahayag nga i-avail niya ang bakuna bangud luyag niya mangin ehemplo sa iban nga mga health frontliners nga duda sa gihapon sa COVID-19 vaccines.
Sa subong, Sinovac vaccines lang ang available sa probinsya sang Antique gani bisan nagaduha-duha suno sa gobernador, luyag man niya pamatud-an nga kun ano ang available nga vaccine amo ang makabig ‘best vaccine’.
Magluwas diri, naghatag naman sang pahanugot ang Food and Drug Administration (FDA) sa Sinovac COVID-19 vaccine nga i-administer para sa mga senior citizens apang kinahanglan ang stringent evaluation sa health and risks antes ang vaccination.
Lakip man sa mga local chief executives sa Antique nga nadala sa Priority Group A1.5 amo ang mga alkalde sang mga banwa sang Sibalom, San Remegio, Anini-y, kag San Jose.
