Arestado ang anum ka mga lalaki lakip na ang apat ka menor de edad nga amo ang ginatudlo nagbuno kag nagkastigo sa isa ka tricycle driver sang nagligad nga tuig sa Brgy. Zamora-Melliza, Iloilo City Proper.
Ang mga gindagdagan sang warrant of arrest amo sanday Jimbo Jasper Pacheco, 19, Jansen Piagola, 18, kag apat ka iban pa nga lunsay naga-edad 16 anyos.
Ang anum ka nasambit nga lalaki ang lunsay residente sang Dela Rama Compound sa Brgy. Zamora-Melliza.
Sa interview sang Bombo Radyo kay Police Captain Shella Mae Sangrines, hepe sang Iloilo City Police Station, iya ginpahayag nga gindakop ang mga suspek sa idalom sang gahum sang Warrant of Arrest sa krimen nga attempted homicide nga may Criminal Case Number 21-86242 nga gin-isyu ni Hon. Elijo Sharon R. Herrera-Bellones sang Regional Trial Court Branch 27.
Gin-isyu ang arrest warrant sang Abril 6 subong nga tuig.
Magluwas sini nga kaso, ginapahayag involved man ini nga mga kabataan sa mga kinagamo sa Iloilo City Proper sang nagligad nga tuig.
Suno kay Sangrines, nagkooperar man ang mga ginikanan sang mga kabataan sang gindakop sang pulis ang ila mga anak.
Gindala sanday Pacheco kag Piagola sa Iloilo City Police Station 1 samtang ang apat naman ka menor de edad ang temporaryo nga gintugyan sa Dalayunan Home for Boys sa Brgy. Bo. Obrero, Lapuz, Iloilo City.
