Subong na nga semana ang schedule sa pag-release sang P1,000 nga financial aid para sa mga barangay tanod sa premier kag segundo distrito sa probinsya sang Iloilo.
Ang mga tanod sa duha ka nasambit nga distrito amo ang naulihi sa pagbaton sang ayuda sa probinsya.
Sa interview sang Bombo Radyo kay Iloilo Second District Board Member June Mondejar, author sang ordinansa nga nagapain sang pondo para sa financial assistance sa mga barangay tanod sa Iloilo Province, iya ginpahayag nga apisar delayed na, nalipay siya nga makabaton man sang bulig ang mga tanod nga nasakpan sang sini nga mga lugar.
May ginhimo lang suno sa iya nga dugang nga verification ang Department of the Interior and Local Government (DILG) sa husto nga listahan sang mga barangay tanod sa probinsya.
Gin-abi-abi man ni Mondejar sa iya pahayag ang nangin papel sang mga tanod sang tion nga tuman pa ka istrikto ang quarantine status sa probinsya bangud sang nagataas nga kaso sang COVID-19.
