ILOILO CITY- Duda si Iloilo Governor Arthur Defensor Jr. nga magapadalagan sa pagka-bise presidente si Presidente Rodrigo Duterte.
Ini kasunod sang pag-adopt sang Partido Demokratiko Pilipino-Lakas ng Bayan (PDP-Laban) sang resolution nga nagakumbinse kay Presidente Duterte nga magpapili para sa vice presidential post sa 2022 national elections, kadungan man sang national council meeting sang partido sa diin miyembro ang gobernador.
Sa interview sang Bombo Radyo kay Governor Defensor, iya ginpahayag nga apisar may yara sang resolusyon ang partido, ang presidente sa gihapon ang magahimo sang desisyon kon sin-o ang mangin standard bearer sang partido para sa posisyon sang pagka-presidente kag bise-presidente.
Nagalaum naman ang gobernador nga mahitso na ang faction sa tunga sang duha ka miyembro sang partido nga sanday Sen. Manny Pacquiao, presidente sang partido kag Department of Energy Secretary Alfonso Cusi, ang party vice-chairman.
Matandaan nga ginkwestiyon ni Pacquiao ang pagpatawag ni Cusi sang national council meeting bangud nga wala ini nag-agi sa proseso sa diin nagakadapat nga aprubahan ini sang party president nga amo si Pacquiao kag party chairman nga si Presidente Duterte.
