Flo Water, ginpat-od ang ‘potable’ nga water supply sa pihak sang pagtaas sang turbidity sang tubig bangod sa Bagyo Dante

ILOILO CITY- Ginpasigurado sang Flo Water Resources Iloilo Inc. nga potable ukon matinlo ang tubig nga gina-supply sa Metro Iloilo Water District sa pihak sang pagbubo sang mamunog nga ulan tuga sang Bagyo Dante.

Sa interview sang Bombo Radyo kay Josephine Ilaguison, plant manager sang Flo Water Resources Iloilo Inc., nga nahamtang sa Brgy. Nanga, Pototan,Iloilo, iya ginpahayag nga sa subong, naglab-ot sa 5.4 meters ang pinakamataas nga lebel sang tubig sa water intake sang treatment facility.

Ang nasambit nga water level suno kay Ilaguison ang tuman ka taas kun ipaanggid sa maximum nga 3 meters nga normal water level.

Ginpahayag ni Ilaguison nga bangud sang pagtaas sang lebel sang tubig, nagsaka man ang turbidity sini gani mas madamo nga chemical ang kinahanglan para sa treatment sang tubig.

Magluwas diri, may yara naman sang ginapatigayon nga daily bacteria test, taste test, color test kag odor test agud masiguro nga matinlo ang tubig nga gina-supply sang bulk water supplier.