ILOILO CITY- Nagdangat sa 128 ka mga COVID-19 patients sa Probinsya sang Iloilo ang yara sa kritikal nga kondisyon kag duha naman ang yara sa severe condition.
Sa interview sang Bombo Radyo kay Dr. Ma. Socorro Colmenares Quiñon, Iloilo Provincial Health Officer, iya ginpahayag nga ini nga mga pasyente ang intubated ukon naka- oxygen samtang yara sa Intensive Care Unit sa mga ospital.
Suno kay Quiñon, ini nga numero ang kabahin sang 1558 nga active cases sang COVID-19 sa bilog nga probinsya rason nga gutok naman ang mga ospital para sa mga pasyente.
Ginakabig naman ni Quiñon nga makaalarma ang record-breaking nga 168 nga nagpositibo sa COVID-19 sa sulod lang sang isa ka adlaw nga nalista kahapon.
Dugang pa sang natungdan, record- breaking man ang dugang nga walo ka napatay kahapon nga adlaw, pinakamataas nga numero sang napatay sa sulod lang sang isa ka adlaw humalin sang nagsugod ang pandemya.
Gintuad naman ni Quiñon nga kalabanan sa mga nagapositibo sa COVID-19 ang nagatrabaho sa Iloilo City kag nagapauli sa kabanwahanan sa probinsya.
Gin-athag naman niya nga wala sila nagahimo-himo lang sang datos agud pakulbaan ang publiko.
Positibo naman ang Provincial Health Officer nga pinaagi sa Executive Order 175 ni Iloilo Governor Arthur Defensor Jr nga nagapatuman sang istrikto nga quarantine protocol kag border control, malikawan ang paglala sang kaso sang COVID-19 kag indi ini mangin masunod nga Negros Occidental nga may masobra na sa 15,000 nga kaso.
