Nagbubo ang simpatiya kag kasubo ilabi na halin sa mga pumuluyo sang Pilar, Capiz matapos ginreport nga ginbawian na sang kabuhi si former Pilar Mayor Gideon Ike Patricio.
Pasado ‘las siete kagab-i sang napatay sa ospital sa Roxas City si Patricio samtang ginabulong bangud sa pagpositibo sini sa COVID-19.
Ini ang ginkumpirma man ni Tenten Belita Patricio, anak sang anay alkalde.
Mayo 25 sang gin-anunsiyo mismo sang anay alkalde pinaagi sa isa ka Facebook post sang iya anak nga si Philippine Councilors League (PCL) Capiz Chapter President Mitch Patricio nga infected siya sang virus.
Santo sa impormasyon nga nakuha sang Bombo Radyo sa pamilya sang anay opisyal, dal-on ang bangkay sang anay alkalde sa syudad sang Iloilo agud i-cremate.
Natalana pa nga mag-release sang official statement ang pamilya Patricio.
Magluwas nga isa ka public official, kilala man ang anay alkalde bilang isa ka purported spokesperson ni Patrocenio “Doc Don” Chiyuto, ang chief executive officer sang Chiyuto Creative Wealth Document Facilitation Services nga ginahingadlan sang otoridad nga isa ka illegal investment scam.
