Ginakabig sang United Kingdom nga isa ka daku nga kadalag-an ang pagbakuna sa masobra 40 ka milyon nga mga tawo sa una nga anum ka bulan sang COVID-19 vaccination program.
Santo sa isa ka pagtuon sang Public Health England, ang duha ka doses sang COVID-19 vaccines ang highly effective ukon tuman ka epektibo batok sa B.1.617.2 ukon Delta variant nga una nga natukiban sa India.
Suno kay Bombo International Correspondent Ramil Isogon direkta sa United Kingdom, nalab-ot na sang gobyerno sang amo nga pungsod ang target sini nga makatanyag sang bakuna sa ‘most vulnerable’ sa Abril 15.
Sa subong, gina-engganyo sang health ministry ang mga mas lamharon nga mga residente nga batunon man ang COVID-19 shot.
Ini ang kasunod sang pagbukas sang inoculation program sa mga nagaedad 25 anyos tubtob 29 anyos subong nga semana.
May gamay nga kahangawa ang health ministry nga balibaran sang mga bataon nga mga residente ang bakuna bangud posible panumdumon sang mga ini nga indi man sila mapatay sa COVID-19.
Apang paathag ni Britain’s Health Minister Matt Hancock, ang pagbakuna amo lang ang pinakamaayo kag pinaka-kritikal nga paagi agud nga matapna ang pandemya kag matapos na ang na-link diri nga deaths, infections, kag hospitalisations.
