Ginkalipay sang Archdiocese of Jaro nga ginpahanugutan na ni Iloilo City Mayor Jerry Treñas ang mga simbahan sa syudad nga magpatigayon sang face-to-face nga misa kag worship services nga may maximum attendance nga 10% sang seating capacity.
Matandaan nga Hunyo 3 sang ginsuspinde sang Archdiocese ang public liturgical celebrations sa tanan nga parokya sa syudad kasunod sang hingyo ni Treñas nga ipaiway anay ang religious mass gatherings bangud sang nagatimbuok nga kaso sang COVID-19.
Sa interview sang Bombo Radyo kay Reverend Father Angelo Colada, director sang Social Communications sang Archdiocese of Jaro, iya ginpahayag nga pabor ini para sa mga tumuluo nga adlaw-adlaw gid nagapadulong sa simbahan.
Apisar nga mabudlay ini ipatuman kun Domingo bangud madamo ang nagatambong sa misa suno kay Colada, magatuman sa gihapon ang amo nga archdiocese sa pagsulundan sang syudad sang Iloilo.
Sa Executive Order No. 50-B ni Mayor Treñas, ‘strongly encouraged’ sa gihapon ang pagpatigayon sang misa virtually para sa benepisyo sang mga tawo nga indi makahalin sa ila balay.
Sa Hunyo 15 natalana nga magatakop ang pagpatuman sang modified enhanced community quarantine ukon MECQ sa Iloilo City.
Sa bahin sang mga parokya sa probinsya sang Iloilo, tubtob sa 30% sang seating capacity sang simbahan ang ginapahanugutan bangud napaidalom ang probinsya sa modified general community quarantine ukon MGCQ.
