Kinahanglan nga ipabilin sang Pilipinas ang istrikto nga border control agud nga makapangudal kag indi madugangan ang kaso sang mas makalalaton kag mas malala nga Delta variant sang COVID-19.
Una diri, nagpahayag si Dr. Soumya Swaminathan, chief scientist sang World Health Organization, nga posible mag-emerge bilang dominant coronavirus variant ang Delta variant sa bilog nga kalibutan.
Ini nga virus ang kilala man bilang Indian variant bangud una ini nga natukiban sa India. Ini ang ginapahayag nga 60% mas makalalaton ipaanggid sa Alpha variant.
Suno kay Health Spokesperson Maria Rosario Vergeire, ang istrikto nga border control amo ang nangin paagi nga na-detect nga may 13 ka kaso sang amo nga COVID-19 variant sa 13 ka mga Filipino seafarers nga mapauli kuntani sa ila nga mga probinsya sa Pilipinas.
Magluwas diri, ginapangabay man ang publiko nga magsunod gid sa minimum health protocols.
Nagpaandam si Vergeire nga posible magaginutok sa ospital kun paglapta ang COVID-19 Delta variant.
