Ginlaslasan ni Iloilo City Mayor Jerry Treñas si Department of Health (DOH) Undersecretary Maria Rosario Vergeire.
Ini ang may kaangtanan sa report sang DOH nga 84,224 doses na nga bakuna ang nahatag sang ahensya sa syudad sa diin 62,804 doses diri ang Sinovac kag 21,420 naman ang AstraZeneca.
Apang suno sa alkalde, 66,554 doses pa lamang ang nabaton sang City Health Office kag ginakwestyon niya kun sa diin nagkadto ang nabilin nga 17,680 doses.
Sa interview sang Bombo Radyo kay Mayor Treñas, iya ginpahayag nga indi sa gihapon maathag kun sa diin nagkadto ang kulang nga mga bakuna nga gin-allocate sa syudad.
Suno kay Treñas, salabton ni Vergeire ang kamatuoran sa likod sang ginpagwa nga data.
Tubtob subong suno sa alkalde, wala man sa gihapon nakig-angot si Vergeire sa iya may kaangtanan sa iya reklamo kun sa diin nagkadto ang ginapahayag nagkaladula nga mga bakuna.
Matandaan nga una na gin-athag ni spokesperson for COVID-19 sang DOH Region VI, Dr. Maria Jocelyn Te, sa Bombo Radyo nga may yara sang mga bakuna nga gin-allocate sa Iloilo City nga wala gindiresto sa City Health Office kundi sa tanan nga mga ospital sang syudad.
Kaangot sini may ginpagwa man nga data ang DOH Region VI may kaangtanan sa masobra 18,000 ka doses sang COVID-19 vaccines nga ginpanagtag sa 11 ka mga ospital sa syudad.
