Wala na sang may i-tago pa bangud daw kaangay nga isa ka “open book” ang kabuhi ni Manila Mayor Isko Moreno.
Ini ang kasunod sang paglapta sang iya mga sexy photos sa social media.
Siya man ang ginpabati-batian ni Presidente Rodrigo Duterte kadungan sang Talk to the Nation nga daw kaangay nga nangin blind item ang iya pagtumod kay Mayor Isko nga nagasuksok sang bikini.
Ginsuyaan kag ginkadlawan ni Presidente Duterte ang mga sexy photos sadto sang alkalde nga nagguwa sa social media.
Suno kay Mayor Isko, artista siya sadto kag wala siya sang may nakita nga malain sa iya ginahimo.
Wala man sang alkalde ginakahuya ang iya nangin trabaho antes nagsulod sa pulitika.
Apang antes pa man ginlaslasan ni Presidente Duterte si Mayor Isko, madamo na nga mga fake news ang nagguwa sa social media nga nagapakita sang dinas-ukanay kag pagdagsa sang mga tawo sa vaccination site sa diin una nga ginpahayag nga sa Manila City ini natabo kag ulihe natukiban nga sa iban gali nga lugar.
Pahayag sang alkalde, nakahibalo man siya kun sin-o ang yara sa likod sang pagpalapta sang sala nga impormasyon.
Sa pagkamatuod dugang pa ni Mayor Isko, ginahimo na nga palangabuhian humalin sang 2016 ang paghimo sang fake news sa diin kada 15 kag 30 sang bulan amo ang ila sweldohanay.
